O cado de lo marica

Yo no soi satisfeito con a esplanicazión d'a reina.

¿Que per qué no?

1.- Perque no bi ha lugar a malinterpretazión.  O desdén d'exprisions como "si istas personas quieren bibir chuntos y bestir-se de nobios", no amenistan matizazions.  Son las que son y punto. Nomás mancaba que ese dito "disbrazar-se" en cuenta de bestir-se.

2.- "No ye un matrimonio".  Ella mesma ba dizir istas parolas, que tampoco no tienen matizazión alguna y que han estau dentro de l'argumentario d'a dreita contra lo matrimonio entre personas d'o mesmo sexo.

3.- "Si os eterosexuals fésenos una manifestazión, colapsaríamos o trafico".  Istas parolas endican, en primeras, que os eterosexuals son lo correuto y que os omosexuals no lo somos.  Tampoco no tienen matizazión, perque, amás, biene a tener dezaga una gran carga de omofobia, a l'interpretarla como una minoría d'a que se pueden fer chanzas.

4.-  Perque a reina en l'echerzizio d'as suyas funzions no tiene opinión politica y no debe fer-la publica.  Seguntes a lei, ixa mesma que le da de minchar, no puede fer opinions propias ni imbiscuyir-se en os afers politicos.  T'autuar ha de tener o refirme d'un ministro.  En o suyo contrato de treballo lo mete bien claro: ripresenta a totz os ziudadans de l'Estau, nos cuaque u no, y tamién os maricas bosamos os impuestos con los que bibe.  No puede malmeter contra qui pagamos a suya bida, ni puede malmeter contra las leis aprebadas per l'Estau.  ¿Qué pasaría si malmetese contra atra lei, como la d'educazión, a de partius politicos u la mesma Constituzión?

Prengo prestada ta ilustrar iste articlo a imachen d'o blog de Peibols de güe, que se lo ha preniu más de chanza, pero ye que a yo istas cosas me meten muito furo...

Sí, güe soi airau, ha d'estar perque me petan o boforón.

"Puedo comprender, azeptar y rispetar que bi aiga personas con atra tendenzia sexual, pero ¿que se sientan argüellosos per estar gais?  ¿Que se puyen a una carroza y salgan en manifestazions?  Si toz os que no estamos gais salísenos en manifestazión... colapsaríanos o trafico.  Si ixas personas quieren bibir chuntas, bestir-se de nobios y casar-se, pueden estar en o suyo dreito, u no, seguntes as leis d'o suyo país: pero que a ixo no lo clamen matrimonio, perque no lo ye.  Bi ha muitos nombres posibles: contrato sozial, contrato d'unión".
Sofía de Grecia,
reina de España.

Dende güe, o 10% d'os ziudadans de l'Estau espanyol, queremos irse sinyal:

(Güe ye un d'ixo diyas d'asperar a que se cuezan as trunfas gollando a trabiés d'a finestra, mientras plebe en a carrera)

No me creigo ixo de que l'agüerro nos baixa la libido.  A yo m'entran ganas de pillar a o primero que pasa.  En zagueras me pasa muito ixo, güe con un rastas cara malo, royo y güellos claros que ha pillau un Nissan en a Canal Imperial- y ficar-lo en o mío sofá baixo una manta y fer una borina petting beyendo zintas mientres difuera plebe dica las cuatro u las zinco d'o maitín.

Y si no ye lo d'o Nissan, será un atro. Bi ha tíos d'os que te namoras y pierden tot cuan ubren a boca y bi ha tíos d'os que pasas y te namoras malas que la ubren. Ixo ye lo que m'ha pasau güe en l'autobou.  O primero en o 42 y o segundo en o 53.  Cosas que tien a bida.  Te puez pegar toda la bida mirando-te de ligar-te a o mesmo zagal y descubres que l'amor puede estar en cualsiquier pueso fueras d'o que buscas.

Y lo que uno busca -y no ye conya, lo que fan os anyos- ye uno que se fique con tú debaixo d'a tuya manta, en o tuyo sofá, y que t'abraze y acarizie beyendo zintas dica las cuatro u as zinco d'o maitín.  Y, si puede estar, que se quede a dormir con tú, y que a o maitín benién desayunez chuntos, y que o primer polbo siga poliu, adoleszentement asperau, con a preparazión d'un nino que busca la suya primera begada...

Talment ixo se trobe en o 42 y en o 53 y no en os de siempre...

(Me'n boi ta quitar as trunfas y meter a o fuego as borrainas.  Dimpués, me miraré de gollar a trabiés d'a finestra ascuitando Coldplay dica que siga la ora d'ir-se-ne t'o treballo).

Dica las istorias más chungas tienen una lectura positiba.  Y si no, miraz a final d'iste bideo :D

Ya parlaba fa tiempo d'un blog titolau Blogback Mountain d'un periodista de El Mundo que se fa clamar Martín Lobo.  Nian muitos d'os treballadors d'iste periodico saben quí ye.  Intresant.  Pero más intresant ye lo que diz.  Güe, no m'he resistiu a fer de yo unas parolas d'él (con o suyo permiso pero sin lo d'o copyright de El Mundo). Unas parolas que pueden estar muito asperanzadoras t'o marica que ya ha pasau a crisis d'os 25:

(...) Me pesan a mía ninyez de yel y fredo.  Faltadas fredas, golladas fredas, chestos fredos, recreus fredos, biernes y sabados fredos y domingos más fredos encara.  Y como soi rencoroso, integrista y desalmau, no xublido ni as faltadas, ni as golladas, ni os chestos, ni os recreus, ni os biernes, ni os sabados, ni os domingos que busatros, companyers d'infanzia y balompié, me regalez mientres anyos.  Ni xublido a umillazión d'estar siempre o zaguero: o zaguero en chinnasia, o zaguero en l'amor y o zaguero en redir.

Pero agora acarizio a trentena, a felizidat y o carma total.  Y m'adedico, no sé si per bergonya u per sadismo, a bailar con as buestras nobias, a consolar-las dimpués d'os buestros gatillazos, a querer-las muito, abrazar-las muito y proteixer-las muito.  Y como que soi un manflorita, si me quedan ganas en os míos ratos libres dixo que os agachez y rindaz pleitesía a la mía entrepierna.

Chicas d'o mundo: lo que a 'Superpop' ha achuntau, que no lo separe denguno.  Nian a puta Eurocopa.  Fez-me ixa fabor.

Me metes furo
encara que no aiga bisto
lo tuyo cuerpo.

Me cuaca tastar a tuya piel
encara que no sepa
cuál ye o suyo sabor.

M'agana enreligar os nuestros cuerpos
encara que maitín no sepa
nian o tuyo nombre.

Me fa goyo despertar entre as sabanas con tú
encara que no aigamos bibiu despiertos
lo que ye un suenio.

T'amo
encara que no
te conoixca.

Quiero ser de tú
encara que tú
no seigas de yo.

(...)

Lo Marica
Pues l'anyada benient se casa la mía companyera de treballo.

Mai
¿Y tú? ¿Te bas a casar?

Lo Marica
Fes-te a la ideya de que no.

Mai
¿Y ixo?  ¿Tiens nobia?

Lo Marica
No.

Mai
¿Y per qué no tiens nobia?

Lo Marica
Pos perque no.

Mai
¿Y per qué no te bas a casar?  ¿No quiers dar-me nietos?

(...)

PS: Per l'inte contino escribindo.  As dezisions quedan ta más t'abán.

Iste puede estar o zaguer post...

A begadas suenio con que exista a pozión azula.  A pozión que combierta cada zelula d'o mío cuerpo en eterosexual. Bella cosa asinas como as pastiellas de Matrix: si quiers continar, mincha-te a pastiella berda, si no, mincha-te l'azula y tot abrá estau un suenio.

Ye como un punto de no retorno cuan ya t'han rezentau toda la istoria: auto-odio, omofobia, sexo per sexo, soridez, BIU, refuse familiar, trolls boques en o blog,...

Güe boi a prener a zaguer dezisión a o respeutibe, güe que ye luna plena -cuántas cosas tiene a luna plena-,...

Si me zorrio a pozima azula tot abrá terminau.  Continaré estando un marica amargau en eterolandia, refusau, sin que denguno empatize con yo (güe contimparaba la situazión con una amiga, dezindo-le que ella tampoco no podeba prebar de lograr una completa empatía como muller con os ombres).

Pero puedo eslechir no zorriar-me a pozima etera y quedar-me con a pastiella berda de Matrix.  En ixe caso, prebaré de crebar os muros d'iste mundo eteronormatibo y mirar-me más t'allá,... Militar en un coleutibo LGTB, fer-me una colla d'amigos maricas, prebar d'ubrir espazios de sozializazión no eterozentristas, bisibilizar o feito marica,...

Si eslicho a pozima azula, trancaré iste blog -u talment dezida dixar-lo en standby, per ixo de no xublidar o pasau-.  Si eslicho continar, continaré.  Y allora, iste blog tendrá sentiu.

¡Cuántas nueitz d'agüerro son estadas asinas!:

O poliu ye descubrir a primera... Bosaría per tornar a bibir-lo.

PS: No debo estar tan luen de l'adoleszenzia.  Un marica plega de nimbiar-me un SMS en aragonés con l'abrebiatura "pxons" :D

Os sodomitas siempre sez enrabiaus y de malla folla, no ye d'almirar ¿quí no estaria airau si le petasen o boforón?
A buena notizia ye que a sodomía tiene cura y que si te i fas mesmo un subumano como tu (¿que codefizién inteleutual tiens, macatrullo?) puede alprender aragonés.
No dixes de besitar un buen siquiatra, te fa falta.

Quiesto amigo:

Sí, soi sodomita.

Sí, soi enrabiau y de mala folla, pero no perque me peten o boforón, sino perque me fa pena que encara exista chen como tú que no rispeta a pluralidat y que no ha rezibiu una educazión en a dibersidat.

A sodomía no tiene cura.  No ye una malotía.  Ye una practica sexual que tamién fan os eterosexuals.  A sexualidat ye muito más que o coito bachinal.

Si estar subumano ye dibercher con a cultura dominant, soi subumano.  Y bien argüello d'ello soi.

O mío coefizient intelectual ye de 125.  No tiengo dengún problema cognitibo.  De todas trazas, l'aprendizache de l'aragonés no ye tan difízil.  As luengas s'aprenden con a prautica.

A omosexualidat disaparixió d'a lista de malotías de l'asoziazión de psiquiatría d'EEUU en 1973.  En 1974 lo fazió a OMS.  Puede estar que ameniste aduya psiquiatrica per a omofobia, pero no per estar gai.

A omosexualidat no ye una malotía.  A omofobia sí, pero cal tratar a os omofobos como ignorans.  Son éls los que tienen un problema.  Qui siente fastio per un semellán, per un miembro d'a suya mesma comunidat, tiene un problema grau.  A os omofobos cal aduyar-les a entender.

S'amanan os Pilars.  Iste blog cumple un anyo dentro d'una semana (no me pienso de fer fiesta).  Muitas cosas chuntas.  Casorios d'amigos, zintas de zine onsas que no quiero remerar-ne (an ye a mía clica onsa?) y asinas asinas,...  A uno ya no l'agana estar marica.  A o prenzipio yera dibertiu, pero agora ya no m'agana. Crisis d'os 25, polbos furtibos, chen que se piensa que todas somos iguals (orteras, alparzeras y porteras).

Istos Pilar no quiero estar-ie.  Ya sabez per qué. Y per qué. Y per qué.  Siempre ye a misma istoria de mundo eteronormatibo, con os amigos, con as amigas, con as clicas no onsas,...  Asinas que iste anyo, como que treballo, aprobeitaré lo puent ta ir-me-ne luen.  Ta Cordoba, que de seguro que astí tot ye igual d'etero, pero bi abrá cosas más interesans.

Ocultaré una begada más ista mía parti d'a mía personalidat ta no sofrir-me.  Como parlaba l'atro diya con Meta, prebaré de fer fuerte una d'as partis más satisfactorias d'o mío yo (ixa que nunca no tendrá cabida en iste blog) y me'n iré a estar feliz escondendo que Zaragoza no mola en Pilars.  U que no mola per estar gai.

Fa uns diyas feba chanzas con una istoria: bi ha tres diyas que se folla fixo: lo 14 d'agosto, l'onze d'otubre y o 31 d'abiento.  O primero estié en o lugar parando-me ta San Roque, o segundo feré un poder ta ir-me-ne (encara que ya yera abitual que estase o mío diya de descanso per Pilars) y o terzero Dios dirá.

Dios dirá perque entre meyas, a la fin, tornaré t'o país d'o trébol luego, encara que Meta diga que ixa isla ye trista.  A lo millor lo que amenisto ye estar triste ta dimpués tornar y estar contento.  Y dixar d'ascuitar Matthew Good Band - Weapon en esterio, d'a banda sonora de Queer As Folk y estar libre d'una begada.

O caso ye que ixa canta, en o Blarney Castle me fazió fer fuera de yo muitas cosas en forma de glarima, que abría de tornar a esar.  Y trayer-me-las en forma de bida.

Per zierto... ¡Buenos Pilars!  O biernes seré en Interpenyas (eteras) beyendo a Los Chichos (ni más ni menos) y o lunes beyendo a o Comando Cucaracha.  Y talment me puye bel diya ta la fiesta d'a biera.  No me i beyerez más.  Bien se bale que curro.