O cado de lo marica

Yeras en o canfranero lo sabado 5 d'abril de 2008. Tenebas o pelo una mica largo y castanyo y portabas una chupa de cuero negro. Dende Uesca, estiés charrando con una zagala. T'endiqué cuan plegábanos en l'apeadero de Riglos. Te i baixés. O domingo 6 i puyés astí mesmo. Te torné a beyer. Baixés en Zaragoza. Y dimpués, disaparixiés.

Me cuacaría que m'escribises.

Me poso debant d'una pachina en blanco. Suenan as doze. Ya ye 3 d'abril. Tres d'abril de dosmilgüeito. Güe fa diez anyos d'o biernes antis de Ramos de milnobazientosnobantaigüeito.

X (clamemos-le asinas) cantaba cantas d'Ixo Rai! con yo. Remeros curtos. O benién ye pillando-nos d'a man dormindo uno a o canto de l'atro y o benién yera achuntando los nuestros labios. Y astí prenzipió tot, fa diez anyos, cuan nomás teneba que catorze.

Si güe me preguntan dende cuan sé que soi marica, a mía rispuesta ye clara: "siempre lo he sabiu". Pero no estió dica aquel diya cuan o mundo s'aturó debán d'os míos güellos y me sintié l'ombre más suzio d'o mundo per fer lo que lebaba anyos asperando fer.

A berdat ye que X y yo no emos parlau guaire dende allora y güe nos trucamos de cabo ta cuan y si nos beyemos en a gay scene nos combidamos a cubatas. Pero él y yo nunca no seremos cosa. Él güe bibe y ye l'ambient. Masiau ta yo que sobrebibié a ixe biernes antis de Ramos de milnobazientosnobantaigüeito d'a pior traza que podeba aber pasau.

O cuatro d'abril de milnobazientosnobantaigüeito yo yera una caixa de dandalos. Parlé con unas "amigas" y un "amigo" de lo que sentiba dimpués de lo que eba pasau. Aquel diya dixón d'estar-ne. O lunes santo l'instituto ya sabeba lo que eba pasau entre X y yo. Y astí prenzipió o bia cruzis adebantau cuatro diyas, pero que s'estendilló más de lo debiu. Cuatro anyos d'eternas chanzas, faltadas y camins pedregosos. O tres d'abril trobé a parola marica en o dizionario. O cuatro, trobé omofobia.

Dende allora han pasau muitas cosas. Parellas, nobietes, polbos, istorias bien rematadas, istorias mal rematadas,... Diez anyos dan ta muito. Os tiempos de l'instituto ya pasón. A omofobia contina estando present, encara que güe no me fa mal. O tiempo teixe denzima napas de zebolla (torno a pillar prestadas as parolas d'Algora, o cantante-marica-de-moda). Talment per ixo, agora cuan un marica desnuda a atro, plora. U cuan una istoria pinta bien, beluno dezide dixar de luitar ta no morir-se en a propia napa de zebolla podrida de puro pudor.

Güe, que ixos tiempos ya pasón, me resisto a o pesimismo, pero a bida tamién m'ha amostrau que me tiengo que resistir a l'optimismo. Y, amás, a begadas, afloran os remeros. Os remeros curtos, como lo d'aquel tres d'abril de milnobazientosnobantaigüeito y os cuatro anyos que le siguión, amando en escuros puestos y prebando de soniar una bida (y un amor) que talment bel diya siga más zerca de trobar.

A o pobre de Martín Lobo, o mantenedor de Blogback Mountain (parlaba d'él l'atro diya) l'han meso os cuernos. A suya parella se'n fue ta Brazil y ya no en tornó como parella. A ver si algún día tomamos un café. Un café. Que se beba el café con Carlinhos Brown. O con Lula da Silva. Ista mena de cosas ben d'estar abituals en marilandia. Como deziba una mayestra d'Antropolochía (güe conzellera), una unibersal cultural.

Una unibersal cultural en a marilandia mundial. Perque a marilandia zaragozana no ye igual que la madrilenca (muito a o nuestro penar) u la de cualsiquier atra parti d'o mundo, pero compartimos opresión (interna y externa); a l'igual que a clase treballadera d'Alemania no ye igual que la aragonesa, pero compartimos opresión (tamién interna y externa).

Talment per ixo caldría chilar ixo de Maricas d'o mundo, achuntaus! y clamar-nos bella cosa asinas como a clase marica internazional, prenzipiar a fer a nuestra intifada omosexual (como en Raspberry Reich; zinta que tos recomendo, per zierto) y prenzipiar a nuestra luita de clases per a dictadura d'o maricariado. Podemos prenzipiar fundando un partiu.

¿A que ye una fatera güe que l'interclasismo ye de moda? ¿U o maricariado ye debán? ¿U una marica d'Aragón no ye o mesmo que una marica d'Asturies? ¡Ui, qué lios!

Dimpués de beyer en a tele lo que he bisto, ye obligau petardeyar. Güe os de Telecinco han repartiu seis mil euros en a plaza de Fuentes d'Ebro. Y ye que s'estrenaba un nuebo programa de telebisión: Las Gafas de Angelino (que sustituye a o disapareixiu Aquí hay Tomate). Angelino ye un personache que s'eslichió en un casting y o ganador estió un zagal de... ¡FUENTES D'EBRO!:

Pues resulta que iste zagal, que ya he catalogau como hipercool, ye muito intresant, más que más, perque no sólo ba a sustituyir o glamour de Jorge Javier Vázquez, sino que tamién ba a relegar a Daniel Zueras a un miserable puesto de ex-diba gai d'Aragón. Quereba dar una tregua en afirmar isto, pero güe, en o programa, trucando a la Cope en direuto, a telefonista s'ha endrezau a él como sinyora y ha teniu que correchir-le ta dizir-le que yera un zagal.

¡Tremolaz totz! Perque ye plegau en Telecinco un mozet aragonés clamau Angelino y que ba a furtar os corazons de toda la marilandia aragonesa (y de difuera)...

El Mundo, un d'ixos periodicos que leye y azuza a la dreita ejpanyola, pero que s'ha destacau per planteyar dudas a bellas posizions d'o PP, como la d'o matrimonio entre personas d'o mesmo sexo y l'adopzión, s'ha tirau a la piszina y ha dixau un forau en a suya seczión de blogs ta un nuebo blog gai -talment sigan agora de 'moda'- titolau Blogback Mountain (s'han matau con o títol, per zierto).

Ya fa bels diyas que boi seguindo os atrebimientos d'iste nuebo blogger -que se fa clamar Martín Lobo- y que prenzipión con un decalogo marica sobre lo que nos depara la gay scene malas que salgamos de l'almario. Dende allora, salpimentau con una mica de patrons feitos, iste nuebo blog promete intes gloriosos en o periodico más bendiu d'a dreita ejpanyola y tamién grans cabezazos en os paretes d'as nuestras cambras. Como la de güe, con o suyo articlo La tortura testicular en lo que airea cosas tan de nusatros, d'ista castiza gay scene de la piel de toro, como Bakala.Org (con foteta d'a portalada y tot).

Me pregunto si Pedro Jota Calvorota preba d'amanar a o suyo periodico a bella mena de maricas trafegaus en as suzias garras d'a dreita y descontentos con o Partido Popular, que a l'igual que Fernando Savater (sí, ixe que escribiba libros sobre ética, toleranzia y igualdat y agora s'ha fundau un partiu nuebo), se piensan que o matrimonio no ha de clamar-se asinas y que os taraus no podemos prener nin@s en adopzión. Pero tamién me pregunto si iste camín d'amostrar as más escuras partis d'a idiosincrasia marica en as pachinas d'a prensa dreitosa ye un camín que nos faiga fuera d'a pandereta a la que os maricas somos acostumbraus y que faiga onra a la berdat diyaria que bibimos ta poder combenzer a os esmos mobius per l'odio que 40 anyadas de franquismo ha teixiu en gran parti d'a soziedat.

Con tot y con ixo, o blog mereixe a pena estar leyiu (dende a chanza, ixo sí) y mesmo comentau. Estoi que nos dará grans intes y muito chuego ta parlar-ne aquí.

Encara que ya la eba bista en os Renoir Princesa de Madrid en o berano pasau, Boy Culture no dixa de sosprender-me. Y no lo dixa de fer perque refleixa barias reyalidatz d'a gay scene sin curtar-se cosa y contando as istorias a corazón ubierto:

"Isto ye lo que me mereixco per pensar-me que os gais son capables d'amar bella cosa más que a éls mesmos. Nian soi seguro de que me quiera a yo mesmo. Me dixaría en o momento que bella cosa millor i surtise. As lesbianas lo tienen fázil. Ye berdat que todas tienen drama, pero nomás perque unas se'n fan per as atras. ¡Que le fotan!"

A zinta no ye dobada y la podez beyer en anglés subtitolau a o castellán:

Parti 1: http://www.youtube.com/watch?v=q2zgoOtU1Cw
Parti 2: http://www.youtube.com/watch?v=gJ3eQi6xe0M
Parti 3: http://www.youtube.com/watch?v=NIvArTrZBPw
Parti 4: http://www.youtube.com/watch?v=YT24RxD24z0
Parti 5: http://www.youtube.com/watch?v=X9gynjX2WLc
Parti 6: http://www.youtube.com/watch?v=LHt7ksepBe4
Parti 7: http://www.youtube.com/watch?v=lXecrbvHLQk
Parti 8: http://www.youtube.com/watch?v=Dn0zsXKa7jQ
Parti 9: http://www.youtube.com/watch?v=AbcABJeMkO0
Parti 10: http://www.youtube.com/watch?v=JynxFVcu5pY
Parti 11: http://www.youtube.com/watch?v=pVQ1rSVgF6s

Sería pior que estase asinas:

En breu, caldrá fer isto (y millor que no bi aiga descuentos):

Podría dixar de leyer a Lorca
ta leyer os tuyos pochons,
enzarraus en a sinrazón d'un almario buedo.
Buedo de sentimientos y de bida,
sin de rayas, ni colors chillonas, ni numeros en as marcas.

Nomás que con un pixama.
Con un pixama estampau
de mils de dibuixos animaus.
Un pixama que porto cuan t'amo,
o mesmo pixama que portas tú cuan m'amas.

Y dormimos chuntos,
leyendo a Lorca,
soniando mentiras.

Podría dixar de leyer a Wilde
-u buscar un Maurice desentronau-
ta dispertar d'un suenio de parolas,
de colors apagadas,
comidas per o sol que te mata,
encara que a yo m'alumbre.

Podría fer que a nueit estase más densa,
que o suyo aire se podese tocar,
que o suyo tacto me remere a tú en cualsiquier puesto,
u que o rudio d'o dispertador no combierta a o diya
en un infierno zeleste que me faiga remerar a nueit.

Pero nomás que remerar-la, nunca será diya
perque l'almario ye buedo
y os dos i cullimos dentro.

Tragando-me a rabia que s'ha tornau buro,
minchando tierra mullada en os charcos d'o mío melico,
podría chenerar a bida si no me la esen arrancau,
si un caso estiese programau ta bibir-la.
Tragando-me dica o fiemo de todas as plantas,
postrando-me debant de tú como a Puerta d'o Carmen,
solida y debil, con cuatro focos que la bulneran,
capable de soportar la guerra, pero no pas una nueit de sabado.
Como lo David desnudo que t'amostra os suyos atributos
con a richidez perturbadera de cualsiquier Regenta,
me trato debant de tú os charcos ta dixar bien limpia Zeta,

de puro repui toxico embeneno lo mío interior.

Tragando buro, plorando muertes,
y mientres tú a catapulta que gomeca la suya gollada:
ni a lo leixos ni a la tuya cucha, güe me tiens en o tuyo piet dreito.
Y podrán secar-me l'augua, furtar-me o cuerpo,
mesmo prebar de deconstruyir-me y chunir-me a la carretera,
perque a la fin me inclino con cada gota que caye,
y a o cabo ya dixés a masiaus sin de chaqueta.

Alberto Acerete de la Corte "El univierso femenino del esperma"
Traduczión: lomarica.nireblog.com