O cado de lo marica

• Aber teniu uns mayestros que me faltaban y me meteban en ebidenzia debant d'os míos companyers.
• Aber bibiu una adolezenzia escondendo-me, mentindo-me, sin saber lo que quereba y tenendo medrana d'estar yo mesmo.
• Aber saliu ta la carrera con medrana de trobar-me con qui no azepta la esferenzia.
• Aber bibiu siempre con a medrana de dezepzionar a mis pais y a la mía parentalla.
• Aber-me sentiu suzio y malo cuan yera fendo lo que sabeba que teneba que fer.
• Aber estau mentiu per qui nomás me quereba que ta buquir.
• Bibir en una soziedat parada ta una cosmobisión de raso esferent a la de yo.
• Aber-me exposau muitas begadas, y de traza conszient, pensando-me en a bondat de l'atro, a malotías fisicas irreparables.
• Salir de farra per garitos que no ban con yo y an que no boi a ligar sin que denguno d'os amigos me porte ta un garito que sí que baiga con yo -y que cuan le'n demande se'n carranye-.
• Tener uns amigos que no m'acompanyan cuan amenisto esprisar-me en un día sinnificatibo ta yo y t'o coleutibo.
• Tener un perfil en Bakala.Org.
• Continar mentido a la mía parentalla.
• Namorar-me de traza cutiana de chen que no le cuaca o mío sexo.
• No tener parella y fer-me a la ideya de que nunca no la tendré ta cutio.
• Sexo, sexo y más sexo sin zarrapita de zelebro ni sentimiento.
• Baixar solenco ta la manifestazión de l'argüello LGTB perque dengún colega etero quiere ir con tú (d'os gais que no i ban, ni parlo).

Au argüello! Dica dosmilnueu!

Ya ha plegau l'argüello y yo m'apresto a buscar amigos ta baixar ista tardi a la manifestazión de l'argüello.  ¿Án son agora os jipijos que baixan a todas as manis contra la Expo, contra o trescole, contra la OTAN,...?  ¿Án son ixos boques?  De cabo d'anyo, en o Pirineu, estudiando ta la oposizión de maitín,...  ¡S'han esfumau! ¡Han dixapareixiu! ¡Se'n son ius!  ¿No ye tan jipijo baixar a ista mena como a la d'a Expo, a la d'o trescole, os entibos u a OTAN?

De traza paralela, busco plan ta ista nueit.  Si os amigos disaparixen ta ir a una manifestazion, más lo ferán ta salir ista nueit de farra per l'ambient.  Asinas que me miro lo bakala y beigo como los mayors pasan de yo per estar mayor y per cómo soi y que os más chiquez pasan de yo per estar mayor y per estar como soi.  Allora yo me pregunto... si os zagals buquen con qui les peta seigan gordos, altos, baixos u nanos... ¿QUÉ COÑO FEBA YO CUAN YERA ZAGALÓN?

¡PREMIO! ¡PLORAR PER AS CANTONADAS! Ista ye una d'as cosas que no cal fer cuan se ye ninón y encara no se t'ha pasau o roz.  Perque dimpués te darás cuenta, como yo, que has estau perdendo lo tiempo mientres tantos y tantos anyos cuan podebas aber estau en Bakala tirando-te a tot lo que se muebe.  Que cuan yes choben, tot ye más fázil.  Y, agora de gran, paras cuenta de lo gilipollas que has estau.

En fin, que buen argüello, que aprobeitez y que tot baiga muito bueno.  A la fin, iste espezial de l'argüello no he puesto fer-lo millor.  Pero a lo menos, bella cosa sí que s'ha feito.

Tos aspero a toz ista tardi en a mani:

Chunta Aragonesista ha demandau con una comunicazión a l'Alcalde de Zaragoza, Juan Alberto Belloch, que iste benién sabado 28 de chunio siga penchau en o balcón d'o Conzello un sinyal de l'Arco San Chuan ta fer prersent o refierme d'o Conzello a la luita d'o coleutibo LGTB.

Diz en ista carta Carmen Gallego -conzellera de CHA que la sinya- que o 30 de chunio de 2005 o Conzello aprebó per unanimidat una mozión en a que se deziba que "o Conzello de Zaragoza se compromete a enantar midas de sensibilizazión y luita contra la omofobia y transfobia; midas educatibas; midas d'integrazión y serbizios d'asesoramiento y orientazión ta gais, lesbianas, bisexuals y transexuals".  Cuan iste texto s'aprebó, a proposa de CHA, se dezidió que o 28Ch abría d'ondear o sinyal de l'Arco San Chuan y per ixo demandan agora que se faiga.  Amás, l'Alcalde se comprometió dreitament con ista causa y desichen, per lo tanto agora, que se faiga.

• Beyer documento

Rubén Gracia, 'Cani' ye un futbolista de Torrero de 27 anyos que chugó en o Reyal Zaragoza dende 2001 dica 2006, anotando un total de 13 gols.  Dende 2006 chuga en o Billarreyal.  Estió galardonau como millor esportista aragonés en l'anyo 2005.  Tamién ha chugau en l'Estadium Benezia y en l'Utebo CF.

Como totz os anyos, ta zelebrar l'argüello gai en Aragón s'ha feito una combocatoria nazional en Zaragoza.  A mani será o sabado 28 de chunio a las güeito d'a tardi en a Plaza de San Miguel.

O testo d'o manifiesto que se i leyerá ye o benién:

PER A BISIBILIDAT LESBICA

O 28 de chunio ye un diya de zelebrazión y reibindicazión...
De zelebrazión perque nos sentimos argüellosos y argüellosas d'estar como somos y de sentir como sentimos.
De reibindicazión perque queremos gritar que, a penar d'os abanzes legals y sozials, que implican mayor cotas d'igualdat, l'ochetibo final, a igualdat reyal, encara ye muito luen.

Queremos zelebrar que 2008 ha estau declarau Anyo d'a Bisibilidat Lesbica en as XXX Trobadas Estatals d'Asoziazions LGTB.  As mullers lesbianas lebamos luitando masiaus anyos t'aconsiguir os nuestros dreitos, y seguiremos fendo-lo mientres seigamos imbeyibles.  Como lesbianas sofrimos una dupla discriminazión imposada per o modelo imperant patriarcal, masclista y eterozentrista: la d'estar mullers y la d'estar lesbianas.  Güe reribindicamos a nuestra bisibilidat en os espazios de prenga de dezisión y de poder, en a bida sozial y en a bida pribada; y lo femos desichindo los dreitos que nos bienen estando negaus de traza reiterada: o dreito a la maternidat compartida, a o control d'o nuestro cuerpo, a l'aborto libre y de baldes, o dreito a amostrar publicament a nuestra afectibidat, o respeto a la nuestra sexualidad sin que cosa ni denguno nos impose limites, condizions u ochetibos esferens a o d'o nuestro plazer.  Iste 28 de chunio queremos manifestar-nos per a bisibilidat lesbica como tributo a os anyos de luita de tantas y tantas mullers, y como traste t'alzar a boz d'aquellas que no pueden fer-se bisibles con nusatras: as maltratadas, as chusmesas, as obligadas a callar y disaparixer.

Queremos zelebrar que l'uno de marzo de 2007 o Congreso d'os Deputaus aprebó a lei estatal conoixida como d'Identidat de Chenero; lei que permite a las personas transexuals que o suyo DNI refleixe a suya propia identidat.  Encara que reconoixemos que se trata d'un abanz, queremos reibindicar que os deberes no son feitos.  Encara que s'aiga eliminau un obstaclo, as personas transexuals concaran muitos más en o luengo y compleixo prozeso de construzión d'a suya identidat.  Per ixo, a l'igual que faziemos en o suyo inte, reibindicamos una autentica Lei d'Identidat de Chenero, que reculla, de traza transbersal y efeutiba la transfobia en toz os suyos aspeutos.

Per ello, refirmamos de traza dezidida la proposizión no de lei presentada rezientement per ERC, ICV y IU ta instar a o Gubierno a lebar a las Cortes un proyeuto de Lei d'atenzión integral a la persona transexual.

Perque güe, 28 de chunio de 2008, a transezualidat contina aparixendo en o Manual de Trastornos Mentals d'a OMS como una malotía mental, imposando a las personas transexuals un control medico que nos ne fa.  Perque ta que una persona tienga dreito a o cambio legar d'o suyo DNI, ye menister aber-se sometiu a un tratamiento ormonal per un periodo de dos anyos, dimpués d'una superbisión psiquiatrica.  Cada persona ha de contar con o dreito a dezidir sobre a suya identidat sin tutelar ni diagnosticos insituzionals.

Güe, reibindicamos a despatolochizazión d'a transexualidat.

Encara más, desichimos que s'enante finitibament o prozeso d'inclusion efeutiba en o Sistema Nazional de Salut de l'atenzión soziosanitaria d'as personas transexuals.  Ta ello, no ye prou con a inclusión en o catalogo de prestazions sanitarias de l'atenzión medica y as operazions de reasignazión de sexo.  No, a lo menos, tal y como se reculle, a trabiés de zentros de refrenzia en ziudaz d'atras Comunidaz Autonomas, obligando a las personas transexuals a desplazar-se t'aczeder a os serbizios prometius y a soportar listas d'aspera interminables y inchistificables ta qui leba toda la bida asperando.  Asinas mesmo, queremos remerar que tanto @s transexuals inmigrans como @s menos d'edat se troban agora mesmo en una arbitraria y precaria situgazión d'indefensión y de manca de dreitos, y que consideramos urchent ataixar ista desproteczión.

Igualment, queremos dar o nuestro refirme a la elaborazión d'a "Lei Integral per a igualdat de trato y contra la discriminazión" que proposa o Gubierno Espanyol.  Una lei que adaptará las directibas europeas referents a la discriminazión de ziudadans y ziudadanas que güe diya, per o suyo sezo, raza u orientazión sexual, continan discriminaus y discriminadas tanto en l'ambito laboral como en l'aczeso a biens y serbizios.  Demandamos dende aquí un compromís d'ista Lei con os ziudadans y las ziudadanas transexuals, coleutibo chusmeso de cutio a actituz denigrans.

Queremos zelebrar d'a mesma traza la cada begada mayor conzienziazión sozial de l'insoportable paper chugau per a Ilesia Catolica, controlada per una cherarquía eclesiastica omofoba, lesbofoba, transfoba, bifoba y retrograda.  Manimenos, os ataques d'a conferenzia episcopal a o coleutibo LGTB+ no se reduzen conforme s'enanta en a reconoxedura lechislatiba d'os nuestros dreitos, más bien a o contrario: manifestazions y prenunziamientos en cuentra d'a lei que regula o matrimonio entre personas d'o mesmo sexo, promozión d'a mal clamada obchezión de conzienzia a la asignatura d'educazión ta la ziudadanía y os dreitos umans, deslechitimazión publica de cualsiquier enante en a rexonoixedura d'a libertat d'as mullers ta echerzer l'aborto...  A lista ye interminable y intolerable.  No somos disposaus ni disposadas a azeptar garra mena de coaczión a os poderes publicos ni a la soziedat zebil per parti d'a Ilesia Catolica ni de garra atra confesión relichiosa.  No en un estau declarau aconfesional per l'articlo 16 d'a Constituzión Espanyola.  Güe ya no queremos endrezar-nos a ixa cherarquía eclesiastica ta demandar-le que zeixe en as suyas continas agresions, puesto que nian nos parixe una interlocutora dinna.  Nos endrezamos a os poders publicos ta desichisles unas midas que entendemos minimas y irrenunziables: que s'impose no sólo que l'aconfesionalidat de l'Estau Espanyol, ya reconoixida encara que no rispetada, sino a suya laizidat; que se retire l'asinnatura de relichión d'os plans d'estudio d'os zentros d'amostranza publicos y conzertaus; que se guaranzie o respeto a una educazión no sexista ni eterozentrista; que se derogue o concordato y se remate finitibament con a finanziazión publica d'a Ilesia Catolica y con cualsiquier trato fiscal de fabor; y, en zagueras, que s'adopten as midas oportunaas ta obligar a la Ilesia a fazilitar y achilizar o dreito d'apostasía d'os ziudadanos y ziudadanas que lo demanden.

Denunziamos que en o nuestro país se mantenga la impunidat dica os delitos de bechazions y torturas, y de traza espezifica en os que se dan os agrabans de transfobia, omofobia, lesbofobia u sexismo, per manca d'imbestigazión y d'asunzión de respsonsabilidaz per parti d'as autoridaz competens, que leba a l'archibo d'os casos en os que as personas que las sufren han dau o trango de denunziar-los.  Ya dende instanzias internazionals como o Relator Espezial d'a ONU, u dende dibersas organizazions de dreritos umans, s'han tresladau a l'Estau Espanyol recomendazions ta que meta os meyos adecuaus ta erradicar istas prauticas, a las cuals nos sumamos dende ista plataforma.

O 28 de chunio zelebramos que nos sentimos argüellosos y argüellosas d'estar como somos y de sentir como sentimos.

¡Per a bisibilidat lesbica!

Ista anyada, o Consello d'a Chobentú de Zaragoza ha refirmau a luita d'o coleutibo LGTB fendo publico en a suya web un manifiesto en que animan a refirmar as reibindicazions d'o coleutibo. Un manifiesto alazetau en a integrazión y a dibersidat. Per a suya sinnificazión, se reproduze de contino en aragonés:

A dibersidat ye una balura positiba ta la soziedat d'o sieglo XXI. Os chobens emos sabiu balurar-la y integrar-la en o nuestro diya a diya. Güe no resulta estrident que trobemos en a nuestra bida diyaria muestras d'ixa dibersidat: razial, nazional, lingüistica, afeutibo-sexual,...

En o manifiesto "Por una soziedat más choben y partizipatiba", que as entidaz d'o Consello construyimos de conchuntas en a VI Feria d'Asoziazionismo Choben "De Libre Eleczión", zelebrada en Zaragoza en o pasau anyo 2007, entendíbanos a dibersidat como una reyalidat en o nuestro modelo sozial choben y nos fébanos argüellosos d'ella.

Como cada 28 de chunio dende 1969, o coleutibo LGTB remera os disturbios que tenión puesto dimpués d'a detenzión d'una colla d'omosexuals en Stonewall Inn, un local d'ambient de Nueba York. Dende allora dica güe a soziedat ha cambiau y ha entendiu que a dibersidat afeutibo-sexual y de chenero ye una reyalidat que ye nezesario azeptar, comprender y balurar.

A nuestra responsabilidat como entidaz sozials ye estar sensibles a ixa reyalidat y autuar en consecuenzia. O mobimiento se contimuestra andando y per ello, o Secretariau d'o Consello d'a Chobentú de Zaragoza ha creyiu combenient partizipar en a reibindicazión anyal d'o coleutibo LGTB dica la plena integrazión sozial que cada anyada se reyaliza en a nuestra ziudat a trabiés d'a platagorgma que se constituye a tal efeuto.

Ista partizipazión s'alazeta en a nezesidat d'estar presentes en aquels foros en os que a dibersidat se combierte en una reyalidat, pero no tendría sentiu si dende o Secretariau no animamos a las entidaz miembro a fer reyalidat en o diya a diya a dibersidat afeutivo-sexual. Ye menister que ista reyalidat siga bisible en l'ambito politico, sendical, educatibo,... Muitos d¡os miembros d'as nuestras entidaz son lesbianas, gais, transexuals u bisexuals y ye o nuestro deber que beigan refleixada y normalizada a suya identidat afeutibo-sexual en o diya a diya d'as nuestras entidaz. Somos dinamizadors sozials en cada uno d'os nuestros seutors y somos os prenzipals responsables de fer reyalidat a dibersidat en toda l'amplaria d'o termino.

Per atro costau, amás de fer reyalidat a dibersidat en o nuestro treballo cutiano, ye menister refirmar aquellas reibindicazions de qui encara en o sieglo XXI son discriminaus per a suya identidat afeutibo-sexual. Encara que o feito omosexual seiga cada begada más bisible y s'aiga enantau en a equiparazión de dreitos zebils, encara quedan pendiens de resolber atros muitos afers, como a luita contra la LGTBfobia, a despatolochizazión d'a transexualidat u a bisibilidat lesbica, per zitar belunos.

Per tot ixo, dende o Secretariau d'o Consello d'a Chobentú de Zaragoza tos animamos a fer partezipes a toz os asoziaus d'as buestras entidaz en l'apuesta per a integrazión y no discriminazión d'as personas LGTB.

Sí, lo sé.  Fa muito que no escribo, y abría de fer-lo más a sobén, pero ye que no adubo ta cosa en zagueras,...

No adubo ta cosa con o treballo, con a mía casa -m'he independizau-, con os rollos d'as mías asoziazions,... Me baga ta tot fueras de ta follar, como siempre.  Pero ye que tampoco no bi ha motibos -ni personas- ta follar.  Iste estiu mortal sin primabera -Labordeta dixit- me ye dixando ta l'arrastre.  Más que más per ixo d'as ganas de buquir con que me debanto toz os diyas.

No bi ha garra cosa nueba ta charrar-ne.  A mía bida contina igual: eteronormatibidat, pallas, omofobia, pallas, medrana, pallas, sordidez informatica, pallas, manca de responsabilidat d'a chen, pallas, bisexuals, pallas,...

Ye a istoria de nunca no rematar, y ta contar toz os diyas as mesmas mierdas con esferens parolas, pues millor no escribo,...

Ya lo feré cuan tienga cosas que contar...

...Y tiempo ta contar-las.

SEC. 1: ESTERIOR, DIYA, PARADA D'AUTOBÚS

Rudio d'a carrera. Se beye plegar l'autobús (primer plano) y la camara cambeya de plano (de frent a la puerta an que baixan os pasacheros.

En primer plano, Pietro baixa de l'autobús. Porta cascos y china chana, s'ascuita a mosica que porta (Green Day, Basket Case).

Pietro anda ta la camara. Cambeyo de plano. Pietro d'espaldas caminando enta un bar.

SEC. 2: INTERIOR D'UN BAR.

Se le beye entrar-ie direuto ta una mesa. Se posa y se quita os cascos, suena a mosica como si s'acuitase dende os cascos. Pietro esenchega o MP3 y lo dixa en a mesa. Biene o cambrero.

CAMBRERO

Hola, buenas. ¿Qué quieres?

PIETRO

Un botellín, por favor.

Pietro pilla o “Heraldo” y lo leye. Mientres, entra en o bar Lorién y ba ta la mesa an que ye Pietro.

LORIÉN

Ola, Pietro.

Pietro debanta la bista d'o periodico y lo reculle.

PIETRO

Ola, Lori. Se besan en a boca. ¿Qué tal yes?

Aparixe o cambrero con o botellín y lo dixa en a mesa.

LORIÉN

A o cambrero: Me pones otro, por favor.

A Lorién: Bien, soi bien. No m'he cansau guaire güe en clase. A dizir berdat, no hemos feito cosa. A primer ora no ha iu lo mayestro, a segunda ora tenébanos istoria y a terzer produzión y nomás emos feito clase normal que en historia. Y tú, ¿qué tal o diya?

PIETRO

Dica os collons d'os cliens. Toz se creyen que nomás esisten que éls. Bien se bale que güe ha tornau Isabel de bacanzas. Si no, me pego tot lo diya atendendo a o telefono.

O cambrero mete a biera de Lorién.

LORIÉN

Muchas gracias.

CAMBRERO

De nada.

PIETRO

¿Y tus pais qué tal?

LORIÉN

Millor d'ixo no en parlamos.

PIETRO

Imos Lorién, no me floras. Emos parlau d'ixo muitas begadas. No puez fer siempre como que no pasa cosa. Pasa, y muito.

LORIÉN

Carranyau. ¡Te he dito que no pasa cosa y no pasa cosa!

En zagueras, cuasi no tiengo tiempo de pensar en o sexo (¡!). Boi d'aquí t'allá con as mil y una cosetas que tiengo que fer amás d'o treballo, as mil y una cosetas d'as que nunca no parlaré en iste blog.

Beluno d'os míos lectors me dizió ya fa tiempo que asperaba que nunca no dixase de parlar de l'afer tematico d'iste blog y a berdat ye que nunca no lo he feito, encara que muitos d'os míos amigos me digan que no comprenden que escriba un blog sobre iste afer y muito menos en aragonés.

Os aragonesofablans me preguntan que per qué escribo d'iste afer. Os maricas me preguntan que per qué escribo en aragonés si no pueden entender-me. Y os míos amigos -"simplament"- me preguntan que per qué escribo d'iste afer y en aragonés.

Maitín -ya güe-, ye primer de mayo. Si escribise de bella cosa más que d'o sexo abría de dizir que ye o diya d'o treballo. O diya d'o treballo con conflicto laboral con a mía interpresa. Y conflicto grau, pero no en parlaré. No en parlaré perque, encara que l'atro diya creticase a Monica Naranjo, güe no foi atra que ascuitar o suyo zaguer disco.

"Y mi palacio fue la juventud". "Decide ya sin ser sentimental quién te ha dicho la verdad y quien no". "Tengo que olvidar que eso que aprendí menos el amor era todo mentira",...

Ixas parolas, chunto a atras, en iste inte, no fan que fer-me xublidar o conflicto laboral, pero bi ha atros conflictos más importans en iste inte (eteros, no prebez d'empatizar, ye claro que no podrez). O sabado he quedau con a mía amiga Jessy ta salir per -literalment- "los garitos más sórdidos de la ciudad". ¿Ye irresponsable que me'n faiga más ixo que os problemas laborals? ¿U ye que o mío palazio estió a chobentut u que he de dezidir sin estar sentimental qui me dizió a berdat y quién no? ¿U nomás que ye tiengo que xublidar que ixo que aprendié -mesmo as relazions laborals-, menos l'amor, yera tot mentira?

Talment sí, ye irresponsable. Pero ye que nadie dizió que os maricas -ni yo- sigamos responsables. Paraz cuenta que a nuestra simient se troba con caca cuan buquimos (¡cudiau, que asinas tamién amamos! -puede estar que nomás que belunos-). No bi ha atra irresponsabilidat a os güellos de Dios.

Bien se bale que ixe no ye o Dios de Chesucristo. Puede estar atro, pero no pas ixe. Nomás cal remerar os bersos d'Alber.

Per zierto, que iste maitín m'he trobau con -clamemos-le- o-zagal-de-fa-un-anyo. Yo yera en o bus, él en a parada. No m'ha bisto. Yera tan poliu como siempre. Pero encara lebo un anyo asperando que nos faigamos un café. Bel diya tos charraré d'él, que a lo menos, él, si lo leye, puede entender-lo. Que ye aragonesofablán. Y gai. ¿Rarizo, no?

Bueno, a lo menos tan rarizo como yo.

¿Entendez l'enfado? Yo no. Abría d'estar-lo, pero no lo soi. Y ixo que no tiengo ganas de buquir,... encara que m'aiga nomorau.  Dos begadas.

As istorias son unibersals. Toda la chen bibe as mesmas istorias, antis u dimpués. Pero que una serie de telebisión en dos semanas relate de traza tan fiel a bida d'uno ye ta fer-se-ne.

Yo no sé encara qué feba o domingo beyendo Fama. Ye berdat que beyer a un pabo bailando en gayumbos no tiene pre, y o mío colega Alber puede dizir muito a o respeutibe.

Manimenos, muito tiempo perdié mirando-me un programa con o que puedes preguntar-te si encara bi ha eterosexuals en o mundo. Perque en telezinco Fidel la yera montando muito muito muito gorda:

Istos diyas que soi remerando y planteyando-me muitas cosas a o respeuto d'a sexualidat y cómo compartir-la con os amigos y que os amigos la compartan con tú, beyer chanzas d'ista traza aduya a tomar-se as cosas con muita umor. Pero uno siempre echa en falta autituz como istas y quieras que no, grans berdaz an que han d'estar-ie...

Pero ya se sabe, a la fin, en a ziudat bi ha más truchas que en o río d'o lugar...

...d'ixo, muitos d'os míos exnobios en saben muito.

Si, a la fin, as istorias son as mesmas siempre. Uno se creye que ye l'unico en beras ta una persona y a la fin tot ye una gran mentira y cuan se descubre a berdat nomás quedan que as tres mes, masache, mascarilla y Meg Ryan. U lo que ye o mesmo, muito chelau de chicolate:

A lo menos, uno siempre puede redir-se-ne. Ye lo millor.