O cado de lo marica

As mesmas istorias de siempre:

Opzions:

a) Petardeyar en Zaragoza.
b) Atender a las mías responsabilidatz asoziatibas.
c) Petardeyar en Madrit.
d) Puyar t'o Pirineu ta descansar.
e) Petardeyar en Barzelona.

¿Cuál dezidiré a la fin?

Trois yeran trois as fillas d'Elena.  Trois yeran trois y denguna no yera buena.  Asinas cantaba a canta popular.   Y asinas son as mías tres fillas d'Elena (que denguna no ye buena):

• X "O Lugarenco".
• Y "O marica solidario".
• Z "O trabelo".

Bistas as zaguers experienzias (con X y Y) cuasi que me quedo con Z, pero ye que no tiene Facebook, ni Tuenti, ni Hi5, sino que nomás tiengo lo suyo MSN.  Y as cosas ya no son como antis,...

De todas trazas, chugando a trois cantos lo que menos puede pasar ye un Ménage avec trois, que no á trois.  ¿Quí picará antis l'anzuelo?

¡Faigan as suyas apuestas! ¿O lugarernco? ¿O solidario? ¿O trabelo?

¡Y tú! ¡Di bella cosa!

Torna Física o Química...

...Y en ista temporada, Fer se'n irá ta Chueca... pero... ¿s'enreligará con Julito?

¿Nos ferán onra a la milenta de maricas que seguimos a serie?  ¿U nomás preferirán contentar que a las quinzeanyeras?

Maricas:  cuan os cuenten cosas sobre a Expo y lo important y guai que ye ta Zeta... remeraz isto:

Soi chentando debant de l'ordinador, ya se sabe, os galbans y maleantz somos asinas.  Güe soi estau en a Gara de Delizias per custions de treballo y he de tornar ascape.  Per ixo chento debant d'o PC.  Bueno, per ixo y perque tiengo que compatibilizar mi poco tiempo con mi soziopatía relazionada con l'emplego d'Internet, como buen marica,...

O caso ye que (nota mental: a ensaladiella con pimiento royo ye de puta mai y sí, ixas manchas que bi ha sobre o teclau son de maionesa...)  he tornau t'o bico en o Redoladas, y dende a Gara de Miraflors dica casa, he pasau per o descampau que bi ha dezaga de l'instituto.  Y he remerau os tiempos... en ixe descampau.

Os primers tiempos maricas.  Y sí, ha d'estar a crisis ista d'os 25, en a que a propia identidat ya no tiene marcha ta zaga y uno para cuenta de que ya tot será asinas ta C-U-T-I-O.

(Ganchada d'ensaladiella)

Da una mica de bertigo saber que a istoria de compartir piso ya no tien buelta ta zaga, que ista ensaladiella ya será ta cutio, que a cama de seguro contine d'una persona y bueda (cuan boi a dormir), que ya no se puede compatibilizar o treballo con a bida, sino a bida con o treballo, y que as nueitz serán sin estrelas rondaderas en a capital u en o Sobrarbe.

...U que as nueitz d'agüerro nunca no me parlarán de denguno.

M'aspera o postre.  Encara tenemos flans que sobrón d'o Campamento.  A tecla E minchará más que no yo, prou que sí,...

Lebo muito tiempo teyorizando a o respeutibe de l'amor y, a istas altarias, me beigo con a capazidat de poder fer una clasificazión d'as menas d'amor que esisten.  Yo las trestallo en tres menas, que, como toda tipolochía, no esiste en estau puro, pueden dar-se casos mixtos d'as tres y, amás, no son consecutibas, ye dizir ni un amor mena A ha de dar puesto a un mena B ni a un mena C.

As tres menas:

Amor mena A: l'enamoramiento d'autobús
Ista mena d'enamoramiento puede dar-se en cualsiquier puesto publico y ta que siga d'ista traza lo han de protagonizar dos personas que no se conoixen u que no tienen garra mena de relazión.  Puede dar-se en a coda d'o pan, en o caixero automatico, en un zine u teyatro, pero lo puesto más abitual an que suzede ye l'autobús.  Tiene puesto cuan una persona diz que s'ha namorau y no tiene mica de compromís ni de conoixedura de l'atra persona.  Simplament ye una atraczión fisica muito fura.

Amor mena B: a remeranza d'a nueit d'antis
Ista mena d'amor tiene puesto dimpués d'una luenga nueit de pasión, sexo, amor y sentimientos trobaus.  Puestar que siga con una persona con la que antis s'aiga experimentau una mena A d'amor, lo que ferá a l'amor mena B más duradero y apasionant.  Consiste en un ensoniamient con a persona con la que has buquiu y se gosa de caracterizar con unas locas ganas de tornar a ripitir y de contautar con ixa persona per cualsiquier meyo a l'alcanze: fixo, mobil, MSN, Facebook u Bakala.

Amor mena C: dos personas que se cuacan muito
Abitualment ye un amor enantau de l'amor mena B, encara que puestar que no.  Ye o sentimiento que se siente cuan dos personas se cuacan.  Puede u no pas aber abiu sexo.  En iste caso, ye más fázil que se dé ista mena d'amor.  Ye como l'asperanza de que una relazión puede ir bien.

Güe, compartindo ista "tipolochía" con una companyera de treballo, m'ha preguntau per a mena d'amor D, una mena d'amor esconoixida que no eba estau explorada encara per a mía teoría cheneral de l'amor. Per ixo, he creyau a ipotesis de que, talment -y nomás que talment- pueda existir una mena d'amor C enantau, que he clamau C+ (ye esclatero que l'amor mena D nomás existe que cuan abrazas a Nabar, l'onso contacuentos).

Amor mena C+: amor berdadero
No s'ha comprobau que pueda existir ista mena d'amor.  Manimenos, bi ha una gran cantidat de sers umans que manifiestan aber-lo experimentau. A mía conoixedura empirica contina imbestigando a o respeutibe sin aber quitau argumentos concluyens.

A mía imbestigazión, que creyeba concluyida, ha quedau allora ubierta de nuebas, per lo que ye menister una rebisión d'a mía TEORÍA CHENERAL DE L'AMOR...   ¿Beluno s'anima aduyar-me a creyar nueba conoixedura empirica?

(...Tamién almito continar experimentando a o respeuto d'as menas d'amor A, B y C, encara que amenisto más conoixedura a o respeutibe d'a ipotesis C+).

Istos diyas, que boi que no adubo (¡amenisto uns diyas de relax, un cabo de semana u millor, bacanzas!), goso de fer a chanza de que "no tiengo tiempo ni ta fer-me pallas".  Cosa que, en reyalidat no ye berdat.  Y lo digo asinas, sin tallar-me: no ye berdat.

Y no lo ye perque agora que paso tres oras a o diya en l'autobús -¿beluno quiere bosar-me o carnet d'adugar?- no foi que beyer más y más jambos ke chivar encara que me muera de lache si se me miran.  Y a berdat ye que a lo menos sí que retengo ixa imachen.  Per ixo de lo que podese pasar dimpués...

Encara que no he trobau cosa millor que as imachens de "Punk fucks emo" de Xtube.  Lo millor de lo millor dica agora.

En fin, que no adubo... Ni ta fer-me pallas.

• Aber teniu uns mayestros que me faltaban y me meteban en ebidenzia debant d'os míos companyers.
• Aber bibiu una adolezenzia escondendo-me, mentindo-me, sin saber lo que quereba y tenendo medrana d'estar yo mesmo.
• Aber saliu ta la carrera con medrana de trobar-me con qui no azepta la esferenzia.
• Aber bibiu siempre con a medrana de dezepzionar a mis pais y a la mía parentalla.
• Aber-me sentiu suzio y malo cuan yera fendo lo que sabeba que teneba que fer.
• Aber estau mentiu per qui nomás me quereba que ta buquir.
• Bibir en una soziedat parada ta una cosmobisión de raso esferent a la de yo.
• Aber-me exposau muitas begadas, y de traza conszient, pensando-me en a bondat de l'atro, a malotías fisicas irreparables.
• Salir de farra per garitos que no ban con yo y an que no boi a ligar sin que denguno d'os amigos me porte ta un garito que sí que baiga con yo -y que cuan le'n demande se'n carranye-.
• Tener uns amigos que no m'acompanyan cuan amenisto esprisar-me en un día sinnificatibo ta yo y t'o coleutibo.
• Tener un perfil en Bakala.Org.
• Continar mentido a la mía parentalla.
• Namorar-me de traza cutiana de chen que no le cuaca o mío sexo.
• No tener parella y fer-me a la ideya de que nunca no la tendré ta cutio.
• Sexo, sexo y más sexo sin zarrapita de zelebro ni sentimiento.
• Baixar solenco ta la manifestazión de l'argüello LGTB perque dengún colega etero quiere ir con tú (d'os gais que no i ban, ni en parlo).

Au argüello! Dica dosmilnueu!