O cado de lo marica

Deciba V, l'hombre enmascarau d'a chenial zinta V for vendetta, que "una revolución sin baile no ye una revolución que mereixca la pena".

Ye cierto, a revolución LGTB, ye una revolución que ha teniu muitas relacions con o baile. Pero lo problema ye que, muitas vegadas, cuan se va a prencipiar a revolución, a uno le meten o baile per o meyo y se remata la historia.

¿Ye iste o baile que mereixe a pena en a revolución?

¿U ye iste o baile que atura la revolución?

A serie d'a BBC"Little Britain" retrata una serie de personaches estereotipaus y divertius. Evidentement, un d'éls ye "the only gay in the village".

Me remera a aquello de "I'm the only gay in the School" y dimpués prencipan totz a salir de l'almario... En reyalidat dibuxan a una mena muito concreta de marica...

Y claro, uno a la fin remata pensando ixo de... "Yo soi l'unico gai de fablilandia"...

Y de seguras que no ye asinas. ¿No?

Iste anyo, os colectivos LGTB han trigau como reivindicación principal, a reconoixedura d'a diversidat afectivsexual en a educación.

Remero los míos anyos de l'instituto, an que me sentiba toda mena de parolas envenenadas, de faltadas y de persecución que, ciertament, han acabau per condicionar a mía vida adulta en seguntes qué custions.

Una adolescencia tragando buro que, no sólo m'ha dixau a remeranza d'estar y sentir-me esferent, sino que, amás, no me permitió vivir a mía adolescencia como sí que lo fación os míos companyers: con as primeras ilusions convertidas en reyalidat, os primers amors, os primers polvos,... No me dixón vivir-los con a normalidat con que las viven os heterosexuals.

No se trata sólo que d'oficializar Educación ta la ciudadanía como meyo d'oficializar una serie de contenius curriculars endrezaus t'o rispeto y a igualdat -que tamién-, sino que se trata d'atras midas muito más importantz: aición tutorial, campanyas de sensibilización, plans transversals d'integración, adaptación de contenius y aicions educativas a la diversidad afectivosexual.

"Chuan tiene cinco carambels. Si plega lo suyo novio, Abel, y le furta tres, ¿cuántos le quedan?". Se me ocurre, como eixemplo,...

Cal fer una reyalidat a diversidat afectivosexual en o sistema educativo, como s'han feito reyalidat atras expresions d'a diversidat propia d'o Ser Humano. Ye una necesidat ta enantar. Y qui s'oponga, s'opone a la diversidat y esfiende a más rancia uniformidat y o más odioso pensamiento unico.

Dimpués de dos meses replanteyando lo blog, güe prencipia la tercer temporada d'O cado de lo marica.

Y ye que, dimpués de muito reflexionar, he parau cuenta de que un blog marica en aragonés contina estando necesario.

En primeras, perque cal que bi haiga blogs en aragonés. L'aragones ye una luenga viva, pero tamién ye una luenga menazada. Per ixo, cal que bi haiga exprisions propias de l'aragonés.

Amás, cal tamién que bi haiga blogs maricas. Tristament, güe continamos estando una minoría en a güembra, una minoría que, encara que nos podamos casar, no caminamos ta una normalización social y cal enantar en lo respectivo a educación, integración y cosmovisión.

Y, si se fa en aragonés, puede que tienga ixe toque transgresor. Y si la imachen cambia enta una imachen más transgresora, puede estar que cambiemos bella cosa d'un movimiento LGTB dormiu en o matrimonio y mercantilizau.

Asinas que sí... encara s'amenista O Cado de Lo Marica.

Y en ista nueva temporada, prometo fer d'iste blog un blog más politico, más activista, y menos petardo... Que per ixo precisament cal que contine publicando.

Tercera etapa... ¡prencipio!

Os que seigaz fiels a las pachinas de videos documentals sobre sexualidat humana, habrez parau cuenta de que a publicidat, en muitos casos, ye adaptada a o puesto an que hi yes i muitas vegadas hi amanixen anuncios de chen de lugars cercanos a o tuyo. Bien, pues o caso ye que, güe, ilustrando lo mío conoiximiento d'anatomía masculina, he trobau una publicidat d'un mocet muito poliu que me convidaba a nadar en... ¡La Muela!

Ye esclatero que a istas altarias d'a película i con a suya primera concellera en a garchola La Muela s'ha convertiu en un lugar intresant ta muita chen, t'os meyos de comunicación y t'a chen in d'iste país nuestro. Agora bien... ¿qué pasa en as piscinas de La Muela? ¿Será lo unico que ha feito bien Mariví antis de que o chuzgau de L'Almunia parase cuenta en ella?

Siga lo que siga iste afer me parixe intresant: zagals de 21 anyos de La Muela convidando-nos a "nadar" en o suyo lugar... ¡Absolución ya! ¡A la fin una persona que nos comprende!

Cal creyar un movimiento ta la Absolución de l'Alcaldesa de La Muela. La Muela ye o nuevo destino gai de preferencia... Una nueva traza de fixar población... ¡Chueca ta Centrovía! 

Plego de leyer o zaguer comentario en o mío blog:

No sapo como e rematau en a tuya pachina leyén os tuyos prexins... pero parix que no t'en mercas guaire bien! Semanada Zurrupia? Creyes porque en l'aimor tu, u qué? =) 

L'amor ye un sentimiento muito furo esferent a o sexo. Ta buquir no cal amor, t'amar no cal sólo que buquir. Son dos cosas esferentz. Y mientres uno ye buscando a l'hombre d'a suya vida, contina tanimientres buquindo tot lo que puede.

Ta fer una definición d'amor m'he pillau o "Dizionario breu de a luenga aragonesa" de Santiago Bal Palazios. 

aimar b. tr. 1. Sentir amor enta bella presona: Aima muito á ra suya mai. 2. Cuacar, fer goyo: Aima as borrainas con una delera grandisma. M'aiman as chiretas. 

Como que no goso ni de buquir-me ni d'enamorar-me ni d'a mi mai, ni d'as borrainas ni d'as chiretas, he decidiu que l'amor no ye ta yo (a lo menos encara) y que m'adedicaré a buquir con hombres, que se me da bien.

Per a resta, continaré asperando l'amor. Tanimientres, llamaré a o sexo simplament sexo.