O cado de lo marica

• Soi a mai a la que no se le permite besitar a os fillos a os que dio a luz, cuidó y crió.  As Cortes dizen que no cumplo los requisitos d'una mai perque agora bibo con atra muller.
• Soi o mesache que nunca no remató l'instituto perque toz os diyas me deziban Manflorita.
• Soi a mesacha a la que fazión fuera de casa suya perque le confesó a su mai que yera lesbiana.
• Soi prostituta y treballo en as carreras perque denguno no quiere contratar a un transexual.
• Somos os pais que enterrón a la suya filla muito antis de lo que cal.
• Soi l'ombre que murió solenco en l'espital perque no le permitión l'aczeso a la cambra a qui eba estar a mía parella mientres 27 anyos.
• Soi o nino sin pais que se despierta de pesadiellas an que l'arrancón d'a unica casa an que l'eban mostrau amor, simplament perque tiene dos pais.
• Me suizidé nomás semanas antis de graduar-me en l'instituto.  Ya no podeba aguantar más.
• Somos a parella que o casero dixá plantada cuan s'entetró de que querébamos logar una cambra ta dos ombres.
• Soi a persona que nunca no sabe qué escusau fer serbir si quiere ebitar estar nimbiau a la comisaría.
• Soi a superbibient da biolenzia domestica que paró cuenta que o sistema de refirme se tornó fredo y distant cuan s'enterón que a mía parella abusiba yera tamién muller.
• Soi o superbibient de biolenzia domestica que no tiene sistema de refirme a o que acudir-ie debiu a que soi un ombre.
• Soi o pai que nunca no ha abrazau a o suyo fillo perque crexié con medrana a amostrar-le l'afeuto a atros ombres.
• Soi a mayestra d'economía domestica que siempre deseyó estar mayestra d'esportes dica que beluno le dizió que nomás que lesbianas fan ixo.
• Soi a muller que murió cuan os paramedicos dixón de tratar-la a l'entederar-se que yera un transexual.
• Soi a persona que se siente culpable perque piensa que podría estar una millor persona si a soziedat no l'aborrezise.
• Soi a persona que tiene que ocultar y reserbar ta sí lo que iste mundo más amenista: amor.
• Soi a choben que s'abergonya de confesar-le a las suyas amigas que ye lesbiana, perque constantement fan chanzas d'ellas.
• Soi o choben amarrau a una balla, golpeau brutalment y albandonau a la mía suerte perque dos ombres 'masclos' quereban 'fer-me una lizión'.

O 7 d'otubre de 1998, Aaron McKinney y Russell Henderson portón a Matthew Shepard a un aria remota a l'este de Laramie, an que reyalizón autos d'odio inimachinables.  Matthew estió amarrau a una balla, an que estió golpeau y albandonau a o clima inmisericorde d'una nueit frega d'agüerro.  Cuasi dezigüeito oras más tardi estió trobau per un ziclista, que inizialment lo confundió con un monyaco.  Matthew morió lo 12 d'otubre a las 0:53 en un espital de Fort Collins, Colorado.

ASASINAU PER ESTAR GAI.
STOP OMOFOBIA!

Porto mals diyas, a berdat.  Cuan prenzipié a fer o blog, dizié que, en parti, quereba emplegar-lo como terapia y güe ye d'ixos diyas en los que ye nezesario que escriba sobre yo, más que más ta beyer si asinas puedo ordenar lo que pienso y lo que siento.  Y ye que, güe, fendo-me una bierra dimpués de treballar (si, bi eba partiu d'Espanya y me'n he enterau cuan yera rematando, talment per ixo bi abese más chen en o bar) he charrau con os míos amigos arredol d'un tema que me'n fa a o respeutibe d'a sexualidat y o treballo y, en beras, he comprendiu que a chen que no ye gai no ye capable d'empatizar con qui sí que en ye.  Y ye que bi ha un sentimiento que, se quiera u no se quiera, no se puede esplanicar con parolas.

Güe, per casolidaz d'a bida, s'han achuntau barios fautors que m'han feito que toda la gran mierda acumulada de l'adoleszenzia y enterrada dende allora s'aiga desenterrau u aiga saliu enta la superfizie.  Ixo ha feito resuzitar bel sentimiento, talment d'ansiedat, que feba anyadas que no sentiba como marica.  Remerar ixa etapa dolorosa d'a mía bida ha feito que me concarase de nuebas con o mío yo desnudo, desprotechiu, sin as "napas de zebolla" d'a canta d'Algora, y he parau cuenta de que en beras, per dentro, me pudro como un cáncer.

Y he tornau a beyer como reziens ixas faltadas d'a puerta de l'instituto, ixa mala intenzión que teneba la chen cuan me pregunta a o respeutibe d'a mía sexualidat y yo callaba.  Y con o mío silenzio perpetuaba una omofobia ofizial, que no sólo yera que difuera de yo, sino que tamién yera dentro, ixe auto-odio per estar como soi y no poder tener una bida "normal", ixas biellas medranas que creyeba superadas, que han tornau a estar güe tan bibas como fa güeito anyadas.

Y m'he bisto trasportau a l'interior d'a mía adoleszenzia con os míos 25 anyos, a ixe inte en que yera construyindo y madurando a mía identidat, y he parau cuenta de que bi ha una parti d'ixa construzión que no ye rematada.  He parau cuenta que en ixa casa (bien alazetada ixo sí) tiene gotilleras.  Unas gotilleras que talment menazen con destruyir-la.

Talment seiga iste l'inte d'apanyar o teito, meter-le una gruesa capa de zimento, pero ixo talment no faiga muito bien a la mía situazión personal en atros ambitos.  ¿He de renunziar a cosas que siempre he quiesto per apanyar ixe teito?  ¿U ye millor dixar-lo ubierto y enantar en as atras cosas que siempre he quiesto ta poder apanyar-lo dimpués?  ¿Será tardi cuan pueda fer-lo con a seguridat de que no me ferá renunziar a ixas atras cosas?

Biellos pantasmas d'o pasau...  A bida ye una religada de mentiras, de meyas berdatz t'amagar-las y de berdatz dolorosas que no fan que tornar a ubrir as construczions personals mal concluyidas.  A lo menos, l'ansiedat se reduze cada begada más, pero, ¿tornará de nuebas maitín?

Ayere quedé a zenar con os míos amigos y dos d'éls se'n baixón a mercar o pan. Cuan puyón, redindo-se, me dión un cartel como ixe, dizindo-me "t'emos puyau un presén". A mía reaizión estió, tamién, la de redir-me-ne.

Puedes pensar muitas begadas a o respeutibe. Per una parti, me cuaca poder fer chanzas con os míos amigos sobre iste afer. Y me cuaca, perque a l'igual que yo puedo redir-me de bellas cosas d'as suyas personas, éls tamién pueden redir-se d'as d'a mía persona. Per atra parti, me parixe que poder redir-me d'isto con yo, endica que ixa parti "sofridora" d'o mundo marica no la foi reyal en yo.

Tamién ye berdat que todas as chanzas piloten sobre o mesmo afer, a la fin, remata cansando, pero isto no me fa mal d'os míos amigos. Lo que me fa mal son atros comentarios, como "nunca no iría con tú ta l'ambient perque no me cuaca ir a os puestos con o culo preto", que ascuité ayer d'un apegau -ixo sí, apegau- ta la mía colla d'amigos.

Ayere dizié a os míos amigos una cosa que ye berdat, a o filo d'iste afer: "Paraz cuenta: he iu ta l'ambient con muitos colegas que m'han feito o chesto de benir-se-ie con yo a fer-se un gotet, chen que no ye ta yo ni o 10% d'o que soz busatros; pero nunca no tos ez beniu con yo ta l'ambient mái, y a yo ixo me fa pensar".

Tamién ye zierto que antisdayere estiemos en Zuma y allí, parlando con atro amigo, dizié, "yo no amenisto que denguno m'acompanye ta l'ambient ta ir-ie, no me cuaca fer-me a bitima. Si quiero ir, i boi. Y si dezido salir con os míos amigos per bars eteros, sé que he renunziau a ligar, pero lo he feito librement, ye a mía dezisión, no pas la d'éls, asinas que no puedo queixar-me".

Ixo ye una berdat, pero tamién ye berdat que si a yo me cuaca estar con os míos amigos en puestos que a éls les gustan, mientres ligan con una mozeta, y me foi contento cuan lo fan, ¿per qué éls nunca no han teniu ixe chesto con yo?

Ya ye. Ya ye dos mil güeito. L'anyo d'a fin d'o mundo t'os zaragozans. Ya ye aquí o diya d'anyo nuebo...

Sí, l'anyada pasada ligué en cabo d'anyo. Y sin querer-lo, ni asperar-lo, ni amenistar-lo,... Istas cosas son asinas, funzionan con as Leis de Murphy, y cuan yes buscando no trobas, pero cuan no buscas te troban. Como diz a canta d'Amaral, podébanos estar zelebrando tamién un atro cabo d'anyo, pero no. Fa bels diyas charraba d'os bisexuals, y sí, me referiba a él. Y lo feba con total rabia, cuasi con odio. Ayere le combidé a una biera y me felizitó lo cabo d'anyo, pero me dizió que no quereba fer-se ixa biera con yo.

Maitín tornará a estar cabo d'anyo y, pero barias custions que no bienen a o caso, he bosau as entradas de dos cotillons. Estaré meya nueit con uns amigos y l'atra meya con atros (a mía colla d'amigos se fragmentó en 1999 y asinas continamos...) pero ya sé que si os astros no s'achuntan como suzedió l'anyada pasada, no boi a tener ni la más menima posibilidat de trobar a beluno que trobe tíos, que no boi a poder sisquiera fatiar. Pero totz os míos amigos podrán fer-lo, en un u en atro cotillón, en o suyo rollo. Y, amás, continan dizindo-me a la cara que nunca no irán con yo al ambient 'no baiga a estar que me entre un tío' (u una tía si ye una tía).

No, yo tiengo claro que si maitín trobo lo que quiero trobar, no seré 'confundiu como un nino', sino que abré trobau lo que he quiesto trobar. Y abré trobau más que muitos d'os míos amigos que fatirarán dica l'amanixer con cualsiquier tía que le bufe la pocha (nunca no millor dito). Pero dimpués, qui se'n irá a buquir con o primer culo que i pasa, seré yo. Claro, que ta ixo soi o marica promiscuo.

Pase lo que pase, maitín ta yo será un diya de cabo d'anyo más, un cabo d'anyo en eterolandia en lo que abré de parixer ferliz y integro, sonredindo de traza ipocrita, fendo creyer que soi feliz, pero a la fin, seré en una cantonada d'o bar, mirando-me-lo, perque ixo, una begada más, no ba con yo...

¡Happy new year 2008!

Nadal ye d'ixas calendatas que fan fastio. No per lo que sinnifica, sino per lo que fa remerar que estamos maricas y que, per muita lei de matrimonio que bi aiga estar marica no ye tan azeptau como parixe.

As nueitz de nadal, continan estando como siempre. Primos con nobia, primas con nobio, primos ninos chugando, preguntas tocagüegos d'os familiars a o respeutibe de mozetas,... Y siempre ye a mesma rispuesta: "no en tiengo, si en tenese te lo diría". Berdatz a meyas. Mentiras a meyas. En tot caso, no ye sólo que una mentira ta la parentalla, tamién lo ye ta uno mesmo.

Más que mas, nadal fa fastio si en ixe diya ye o 6eno abo d'anyo con un ex (¡hostia que gran que me foi!). En o mío caso, no le beyeba dende Pilars y agora bibe en Londra, pero ye beniu ta casa, como El Almendro, per Nadal. He quedau con él y atros amigos y a nuestra combersa sobre o cabo d'anyo ye estada curta. Prou corta. En seis anyos cambian muitas cosas...

Parentalla, amigos que fa muito que no beigo, biaches en o bus pleno,... Y plega un inte en que ¡s'atura o mundo! Combersa fata: propositos d'anyo nuebo... y... ¡confesión! "Asperar a que iste me demande bella cosa important!" Oh no! Matrimonio. ¡Alarma! A primera parella d'amigos se casa... U ye fendo plans. Y lo sueltan asinas, de sopetón.

O mundo se'n ba t'abaixo. Toda la resta d'a mesa (maricas totz) ubre a boca. ¡No puede estar! ¿Ya? D'as crisis maricas tres son as piors: conoixer-se y reconoixer-se, salir de l'almario en casa y... ¡as bodas d'os amigos eteros!

Eterorormatibos, claro. Perque per muito matrimonio marica que bi aiga en o nuestro país, iste inte contina estando trachico. L'etero troba parella antis que no lo marica y se casa tamién antis. Mientres os maricas biben en ixe perfeuta adoleszenzia contina, en la que denguno no quiere comprometer-se (pero totz cretican a totz per no querer comprometer-se), de pronto, s'atura lo mundo y a primer parella d'amigos heteros ¡se casan! Y uno prenzipia a pensar...

¿Cómo será la mía boda?

¿L'azeptarán mis pais?

¿Bendrá toda la parentalla? ¿Qué pensará 'la tía de Burgos'?

¿Qué pensarán mis pais de lo que piensa 'la tía de Burgos'?

¿Seré feliz?

¿Seré un infeliz toda la mía vida perque bi abrá chen que no reconoixerá o mío matrimonio? ¿Y si no lo reconoixen os mios amigos? ¿Y si no lo reconoixen mis pais? ¿Y si no lo reconoixe 'a tía de Burgos'?

¿Mi boda será como la d'os míos amigos?

En fin, bodas... Cuasi prefiero la parella de feito.

As cosas nunca son lo que parixen estar:

Pregunta retorica: ¿Cómo sabes cuan una persona amenista buquir?

Resupesta retorica: Cuan sale d'un bar un sabado de nueis y chila: "Joder, soi farto ya, ¿beluno de busatros no querrez buquir-me?

Fa tres u cuatro anyos que tenié lo goyo de conoixer a Metabolic a trabiés d'o suyo Fotolog, pero no estió dica la fin d'o pasau berano cuan nos adibiemos a la lista de contautos d'o MSN y prenzipiemos a charrar. Él estió -si no lo primer- una d'as primeras personas que conoixión a existenzia d'iste blog.

A o poco tiempo, una ideya, d'ixas que meten furo a cualsiquiera, nos rondó a cabeza dimpués de que Meta s'ubrise o suyo suyizo blog. A ideya estió chirmanar-los. Tenébanos un prezedén: www.arast.net. Pero nusatros no compartíbanos una ideya politica (u a lo menos no sólo que ixo), sino que compartíbanos dos cosas más traszendentals ta nusatros: emplegábanos como luenga beiclar una luenga minoritaria y charrábanos en os nuestros blogs d'afers relazionaus con o mal clamau "mundo gay".

A ideya permanezió en as nuestras cabezas dica que le diemos forma y dezidiemos fer un terzer blog, iste compartiu, trigando ta ixo a luenga anglesa.

Per ixo, güe tiengo lo goyo de presentar-tos:

http://thefags.nireblog.com

¡Aspero que tos cuaque a todas y toz!

Toda marica que se prezie se fa a lo largo d'a suya bida una serie de preguntas, seguntes s'aiga conoixiu, azeptau u biba a suya sexualidat de traza plena. Güe me boi a permitir fer una chanza con iste afer.

He feito tres rans de preguntas, de traza que si se responden correutament a lo menos dos preguntas d'un ran se ye parau ta responder una pregunta d'o ran inmediatament superior. Ebidentement, aconsiguir responder de traza correuta a pregunta unica d'o ran numero 4 te combierte, a la fin, en un ser parau ta todas as ebentualidaz.

PREGUNTAS RAN 1

• ¿Per qué cuan beigo una porno con os colegas d'o bico paro cuenta en as pollas?
• ¿Dica cuán tendré que disimular a trempada en o bestuario?
• ¿Será posible que siga gai?
• ¿Y si soi bisexual?
• ¿Ye posible que me cuaquen as muller ta mantener una relazión amorosa y os ombres ta follar?

PREGUNTAS RAN 2

• ¿Soi un omosexual como a resta?
• ¿Quí ye a muller d'a relazión?
• ¿Abría de prenzipiar a salir per l'ambient ta poder follar?
• ¿Ye igual de maricón qui da como qui rezibe?
• ¿Tiengo que salir de l'almario ta estar de raso marica?

PREGUNTAS RAN 3

• ¿Dica dó puedo dilatar?
• ¿Qué pasa si me tiro un pedo mientres me follan?
• ¿Dica dó puede plegar ixo? (¡¡¿tot ixo ye de tú?!!)
• ¿Án dixé o lubricante?
• ¿Será ya tiempo de mercar un nuebo dildo?

PREGUNTA RAN 4

• ¿Per qué en as pornos tot ye tan fázil?