O cado de lo marica

Salimos d'o Loch Ness.  Dos parellas y yo.  Propongo ir ta l'ambient a fer-nos un cubata.

- Que no imos ta l'ambient, co!  Siempre pensando-te en tú.  ¿Per qué no lo botamos?

Lo botamos.  Sale a fabor.

- Pues yo no boi ta l'ambient.
- Me'n boi ta casa - digo - Asinas iz busatros an que queraz.

Pillo Corona d'Aragón t'adebán.  Me chilan que torne.  Torno.

- Bale, i imos.  Pero si i imos ye ta que te quedes.
- Si lo fez ta que me quede, a yo no me sale d'os collons ir-ie.  Imos t'atro puesto.

Diziz-me que beluno comprendez lo que fazié.

Fa uns diyas que parlaba en o blog d'o que supusión ta yo os anyos d'a mía adoleszenzia. Totz tenemos istorias similars, más o menos difízils. L'atro día leyeba un atra en un fotolog. Cuasi todas se parixen, repiten as mesmas parolas, os mesmos sentimientos. Nomás cambian que os suchetos, a begadas en primera persona, a begadas en una terzera impersonal que roza la nezesidat d'un anonimato.

Pisando Fuerte u Isla Ternura son pachinas que pueden aduyar, pero no d'ixan d'estar oasis en o disierto d'a eteronormatibidat a la que un adoleszent, que amenista estar refirmau per una colla d'amigos, ha de concarar-se sin más aduya que uno mesmo. Perque güe nomás que uno mesmo, per muita aduya que reziba d'educadors, psicologos u atros profesionals sozials, tiene a zaguer parola t'azeptar-se, querer-se y bibir de traza autentica. A más gran parti d'a culpa d'ista situazión ye responsabilidat d'un sistema sozial y d'una cultura que no azepta la omosexualidat como traza d'esprisión d'a sexualidat.

Per ixo, ye nezesario que a soziedat entienda que ista reyalidat existe y mirar-se-la con normalidat. No se trata nomás que de rispetar a esferenzia, sino d'integrar, entender y normalizar a esferenzia. No aduyan compadezimientos, ni trachicomedias, ni tampoco no liberalismos sexuals esprisaus con un maniqueu cadagún con o suyo culo que faiga lo que quiera. Cal superar tot discurso eteronormatibo.

Y en iste treballo ye important o paper d'educadors, pais, mais, achens sozializadors, asoziazions, politicos,... Si no nos mobemos totz -omos y eteros- no plegaremos en garra puesto. Perque como manteniba l'atro diya, l'aliberazión sexual de totz ye l'aliberazión sexual d'o coleutibo LGTB. Con ista luita, no sólo ganamos que os maricas, ganaremos totz.

...tiene mal gusto.

¡Por -Christian- Dior! Que belun@ le diga a Rajoy que ixa corbata, amás de fiera, no pega con a suya chaqueta.

• Tener una mariliendres.
• Baixar-se os pantalons cuan quiera y án quiera t'amostrar os gayumbos.
• Bailar a Kylie, Spice Girls, Pet Shop Boys y, de cabo cuan, Village People y The Weather Girls.
• Estar a reina de l'ambient a lo menos una nueit en a suya bida.
• Condons -y lubricant- de baldes.
• A lo menos una cambra escura per ziudat de más de 10.000 abitadors.
• Facturas de zelular que ronden os zien euros.
• Zonas de cruising en grans espectaclos.

Y...

• ...emplegar a parola marica.

Yeras en o canfranero lo sabado 5 d'abril de 2008. Tenebas o pelo una mica largo y castanyo y portabas una chupa de cuero negro. Dende Uesca, estiés charrando con una zagala. T'endiqué cuan plegábanos en l'apeadero de Riglos. Te i baixés. O domingo 6 i puyés astí mesmo. Te torné a beyer. Baixés en Zaragoza. Y dimpués, disaparixiés.

Me cuacaría que m'escribises.

Papelería numero 1: Me miro as rebistas, no me dizen cosa. No bi ye.

Papelería numero 2: Dentro. Me miro todas as rebistas. No bi ye, me preguntan. ¿Qué buscas? La Zero. ¿La revista Año Zero? No, la Revista Zero. (gollada). No la recibimos, lo siento. Hasta luego.

Papelería numero 3: Dentro, me miro todas as rebistas, no la trobo. No quiero preguntar-ne. Soi farto ya d'as golladas. De pronto, sin querer, le doi una patada a una rebista encartonada, emplasticada. Se caye. La dependendienta ba a pillar-la ta dixar-la bien. Oh yeah! A rebista Zero! Se me queda mirando, me sonride. Pillo la rebista, le'n doi ta que me cobre. ¿Te la meto en una bolsa ta que la portes millor? Ummmm...

Bar d'o bico: Demando un tallau con chelo y prenzipio a gollar-me a rebista. Pasa una bezina. Rapedament, pillo a mochila, la poso denzima d'a rebista (tapando lo culo d'un chuzo que me yera metendo canyón) y foi como que busco lo mobil... Hola que taaaaaal!

¡¡¿Ye que no se puede mercar y leyer una rebista gai tranquilo?!!

Y güe, m'agana prenzipiar un meme. Astí ban as tres cosas que más me rebientan...

Uno.- Que me clamen per o nick de Bakala.

Dos.- Que me mientan cuan quieren tallar con yo (u que totz empleguen a mesma sincusa).

y Tres.- Que, amás, me faigan siempre meter o condón a yo (antimás d'estar puta, meter a cama).

Nomino a: El Marica (Asturies), /tusmanosdebarro, Peibols, Aragonando y Adebán.

Me poso debant d'una pachina en blanco. Suenan as doze. Ya ye 3 d'abril. Tres d'abril de dosmilgüeito. Güe fa diez anyos d'o biernes antis de Ramos de milnobazientosnobantaigüeito.

X (clamemos-le asinas) cantaba cantas d'Ixo Rai! con yo. Remeros curtos. O benién ye pillando-nos d'a man dormindo uno a o canto de l'atro y o benién yera achuntando los nuestros labios. Y astí prenzipió tot, fa diez anyos, cuan nomás teneba que catorze.

Si güe me preguntan dende cuan sé que soi marica, a mía rispuesta ye clara: "siempre lo he sabiu". Pero no estió dica aquel diya cuan o mundo s'aturó debán d'os míos güellos y me sintié l'ombre más suzio d'o mundo per fer lo que lebaba anyos asperando fer.

A berdat ye que X y yo no emos parlau guaire dende allora y güe nos trucamos de cabo ta cuan y si nos beyemos en a gay scene nos combidamos a cubatas. Pero él y yo nunca no seremos cosa. Él güe bibe y ye l'ambient. Masiau ta yo que sobrebibié a ixe biernes antis de Ramos de milnobazientosnobantaigüeito d'a pior traza que podeba aber pasau.

O cuatro d'abril de milnobazientosnobantaigüeito yo yera una caixa de dandalos. Parlé con unas "amigas" y un "amigo" de lo que sentiba dimpués de lo que eba pasau. Aquel diya dixón d'estar-ne. O lunes santo l'instituto ya sabeba lo que eba pasau entre X y yo. Y astí prenzipió o bia cruzis adebantau cuatro diyas, pero que s'estendilló más de lo debiu. Cuatro anyos d'eternas chanzas, faltadas y camins pedregosos. O tres d'abril trobé a parola marica en o dizionario. O cuatro, trobé omofobia.

Dende allora han pasau muitas cosas. Parellas, nobietes, polbos, istorias bien rematadas, istorias mal rematadas,... Diez anyos dan ta muito. Os tiempos de l'instituto ya pasón. A omofobia contina estando present, encara que güe no me fa mal. O tiempo teixe denzima napas de zebolla (torno a pillar prestadas as parolas d'Algora, o cantante-marica-de-moda). Talment per ixo, agora cuan un marica desnuda a atro, plora. U cuan una istoria pinta bien, beluno dezide dixar de luitar ta no morir-se en a propia napa de zebolla podrida de puro pudor.

Güe, que ixos tiempos ya pasón, me resisto a o pesimismo, pero a bida tamién m'ha amostrau que me tiengo que resistir a l'optimismo. Y, amás, a begadas, afloran os remeros. Os remeros curtos, como lo d'aquel tres d'abril de milnobazientosnobantaigüeito y os cuatro anyos que le siguión, amando en escuros puestos y prebando de soniar una bida (y un amor) que talment bel diya siga más zerca de trobar.

A o pobre de Martín Lobo, o mantenedor de Blogback Mountain (parlaba d'él l'atro diya) l'han meso os cuernos. A suya parella se'n fue ta Brazil y ya no en tornó como parella. A ver si algún día tomamos un café. Un café. Que se beba el café con Carlinhos Brown. O con Lula da Silva. Ista mena de cosas ben d'estar abituals en marilandia. Como deziba una mayestra d'Antropolochía (güe conzellera), una unibersal cultural.

Una unibersal cultural en a marilandia mundial. Perque a marilandia zaragozana no ye igual que la madrilenca (muito a o nuestro penar) u la de cualsiquier atra parti d'o mundo, pero compartimos opresión (interna y externa); a l'igual que a clase treballadera d'Alemania no ye igual que la aragonesa, pero compartimos opresión (tamién interna y externa).

Talment per ixo caldría chilar ixo de Maricas d'o mundo, achuntaus! y clamar-nos bella cosa asinas como a clase marica internazional, prenzipiar a fer a nuestra intifada omosexual (como en Raspberry Reich; zinta que tos recomendo, per zierto) y prenzipiar a nuestra luita de clases per a dictadura d'o maricariado. Podemos prenzipiar fundando un partiu.

¿A que ye una fatera güe que l'interclasismo ye de moda? ¿U o maricariado ye debán? ¿U una marica d'Aragón no ye o mesmo que una marica d'Asturies? ¡Ui, qué lios!

Dimpués de beyer en a tele lo que he bisto, ye obligau petardeyar. Güe os de Telecinco han repartiu seis mil euros en a plaza de Fuentes d'Ebro. Y ye que s'estrenaba un nuebo programa de telebisión: Las Gafas de Angelino (que sustituye a o disapareixiu Aquí hay Tomate). Angelino ye un personache que s'eslichió en un casting y o ganador estió un zagal de... ¡FUENTES D'EBRO!:

Pues resulta que iste zagal, que ya he catalogau como hipercool, ye muito intresant, más que más, perque no sólo ba a sustituyir o glamour de Jorge Javier Vázquez, sino que tamién ba a relegar a Daniel Zueras a un miserable puesto de ex-diba gai d'Aragón. Quereba dar una tregua en afirmar isto, pero güe, en o programa, trucando a la Cope en direuto, a telefonista s'ha endrezau a él como sinyora y ha teniu que correchir-le ta dizir-le que yera un zagal.

¡Tremolaz totz! Perque ye plegau en Telecinco un mozet aragonés clamau Angelino y que ba a furtar os corazons de toda la marilandia aragonesa (y de difuera)...

Tanner yera reyalment poliu. Yera castanyo y teneba o pelo curto y una cara blanca blanca con pequetas (as an Irish Pink Man). Puyó a l’autobou poco dimpués que yo y se posó a o mío canto. Yo iba ascuitando Coldplay en l’iPod y, con a plebia cuasi querendo cayer, podría aber pensau que yera en cualsiquier atra ziudat si no estase perque yera o mesmo recorriu que toz os diyas.

Rezé ta que no s’acotolase a batería de l’iPod y tenese que rendir-me a os encantos de Tanner, pero as mías plegarias no funzionón y Clocks se talló chusto en l’inte más poliu d’a canta (siempre pasa o mesmo). Talment as plegarias de Tanner estasen más fuertes que las de yo.

Recullí os cascos y guardé l’iPod en o mío morral, que porto denzima siempre dende fa siete anyos. Encara que me cuaca, ya ye una mica crebau y remendau, asinas que podez regalar-me un atro (de loneta, per fabor) cuan queraz.

O caso ye que Tanner, o choben castanyo de pelo curto y cara blanca con pequetas (as an Irish Pink Man) s’endrezó ta yo:

- Ei, has quedau u qué?
- No, no he quedau. Boi t’o treballo.
- ¡Si ye domingo!
- Ya, pero yo treballo los domingos. Uno par d’atro.
- Os domingos abrían d’estar ta descansar.
- Ixo mesmo digo yo.

Bi abió un chiquet silenzio.

- ¿Te puedo fer una pregunta? – me dizió.
- Sí, adebán.
- ¿Creyes en Dios?

¡Bonita pregunta ta istas oras! Han cambeyau güe a ora, boi a treballar antis de lo normal y soi dormiu. Quereba ascuitar Coldplay y Dios no m’ha dixau,… Manimenos, respondié.

- Sí, creigo en Dios.
- Me cuaca que me faigas ixa respuesta. Yo tamién creigo en Dios.

¿Y? No goso de parlar d’istas cosas en l’autobou…

- ¿Y rezas a Dios? – me tornó a preguntar.
- Sí, goso de fer-lo.
- ¡Qué alibio! ¡No soi tan rarizo!

Lo dirás tú…

- Muitas personas lo fan – dizié yo.
- Ya lo sé. Allora, si gosas de rezar a Dios, dixa-me que t’amostre unas cosas.

Ebidentement, lo que m’amostró estió lo Libro d’o Mormón (podeban traduzir-lo ta l’aragonés como han feito con os abanchelios).

- No te’n faigas con ixo – le dizié malas que lo beye – soi cristián, sí. Cristián y podría dizir-se que “meyocatolico”,…
- ¡Ixo no ye problema! Muitos catolicos han trobau a Dios más fazilment con nusatros.
- Ya, pero ye que yo, amás, lo trobo fornicando con ombres.

Silenzio.

Fin d’a istoria.

Dos paradas dimpués, baixo de l’autubou. Y me’n boi t’o treballo.