O cado de lo marica
Mariconeando en aragonés dende 2007

Dentro en a librería, foi que me miro libros, baixo la cabeza y beigo unas zapas amariellas, con debuxos.  Boi china chana debantando a gollada.  Baqueros azuls, chambreta negra, plego en a cara: barba de tres diyas, pelo curto, gafas.  Ye leyendo a contraportalada d'un libro.  Me lo miro intresau.  Dixa o libro, se me mira.

Pillo lo mío mobil en plan marica -me lo he mercau d'ixos mobils que te los miras y dizes: "marica"-, me miro si he rezibiu bel mandau.  Denguno.  Güe toca zine, solenco parixe estar, s'han meso en marcha os mecanismos d'as sincusas: "me fa mal a cabeza", "soi en o mío lugar",...  Os míos amigos asperan difuera, mirando-se a platería... Os libros son masiau ta éls.

Paso per una farmazia y remero que s'acotolau o lubricant.  Abría de mercar-ne, pero "¿ta qué?" me pregunto.  Me fa bergonya entrar-ie ta ixo y denguna d'as mías amigas me fan a fabor d'entrar con yo.  Plegamos en a Condunería, i dentramos, os productos ta maricas son o duple de caros que os productos ta eteros.  Me carranyo.

Boi a per as dentradas d'o zine, ta beyer a zinta d'o fustetas.  En a coda d'o caixero me trucan.  Ye l'agromarica.  S'achunta ta ir t'o zine.  A la liendres no le i fa.  Asinas que nos n'imos.  Lo zaguero que mancaba ye beyer "Vicky Cristina Barcelona".  Y a suya frase estrelar: "Desnuda-me antis de que prenzipiemos una discusión politica".  L'agromarica se me mira, me lo miro, nos ne redimos.  Muito furo, a lo menos ta estar de bacanzas.

Imos ta l'autobus, como de costumbro dende a Expo plega tardi.  Zinco combersas de bez.  No puede estar.   Pillar o bus ta puyar t'o bico tiene o problema de que te puez trobar a meyo bico.  Y claro, cal explanicar: l'agromarica, a liendres y no nos n'emos iu a mirar-nos una zinta a o respeuto de sexo, arte y psicoanalís.  O resumen d'una bida, una bida en resumen.  Muito furo, a lo menos ta estar de bacanzas.